Лондоннинг "Тоттенхэм" клуби жамоа бош мураббийи Томас Франк истеъфога чиқарилганини расман эълон қилди. Бу ҳақдаги баёнот клуб расмий сайтида эълон қилинди. Тегишли қарор директорлар кенгаши томонидан қабул қилинган.
"Томас 2025 йилнинг июнь ойида тайинланган эди ва биз келажак йўлида биргаликда ишлаш учун унга керакли вақт ва ёрдамни беришга қатъий қарор қилгандик. Бироқ натижалар ва ўйинлар даражаси директорлар кенгашини мавсумнинг ушбу босқичида мураббийни ўзгартириш зарур деган хулосага олиб келди. Клубдаги фаолияти давомида Томас ўз ишига содиқлигини намойиш этди ва бор кучини клуб ривожига бағишлади. Биз унга қўшган ҳиссаси учун миннатдорчилик билдирамиз ва келгуси ишларида муваффақиятлар тилаймиз", — дейилади баёнотда.
Томас Франк АПЛ доирасида "Ньюкасл"дан қабул қилинган мағлубиятдан (1:2) сўнг лавозимини тарк этди. Ушбу муваффақиятсизликдан кейин "шпорлар" 26 турдан сўнг 29 очко билан АПЛ турнир жадвалида 16-ўринга тушиб кетишди.
