«Аталанта» дарвозабони Марко Карнесекки клубини ўзгартириши мумкин.
«Calciomercato» нашри берган маълумотларга кўра, 25 ёшли посбонни ўз сафига қўшиб олишга «Ювентус» қизиқиш билдирмоқда. Турин клуби Микеле ди Грегорионинг ўйинидан тўлиқ қаноатланмаяпти, шу сабабли «Аталанта»га дарвозабонларни алмаштиришни таклиф қилишга тайёр. Агар Бергамо жамоаси жорий мавсум якунларига кўра Чемпионлар лигасига йўлланма ололмаса, клублар ўртасидаги музокаралар янада жиддий тус олиши мумкин.
Марко Карнесекки 2017 йилда «Чезена»дан «Аталанта»га 1,7 миллион евро эвазига ўтган эди. Унинг шартномаси 2028 йилнинг 30 июнига қадар мўлжалланган. Жорий мавсумда голкипер 32 та ўйинда майдонга тушиб, 30 та гол ўтказиб юборди ва 13 та учрашувда ўз дарвозаси дахлсизлигини сақлаб қолди.
