Испания Кубогининг ярим финал босқичи регламентига кўра, ғолиб икки ўйин натижасига кўра аниқланади. Пайшанба куни «Атлетико» ва «Барселона» Мадридда қарама-қаршиликнинг биринчи қисмини ўтказишади. Каталонияликлар устози Ханс-Дитер Флик жавоб ўйини борлигини ёдда тутиш қанчалик муҳимлиги ҳақидаги саволга жавоб берди.

«Ғолибни иккита ўйин белгилаб беради. Агар ўтган мавсумни эсласак, жуда қийин бўлган эди. Ўшанда дастлаб ўз уйимизда ўйнагандик ва бу ақл бовар қилмас баҳс бўлганди. Бизни 180 дақиқадан кўпроқ вақт кутмоқда — ҳар икки ўйинни ҳам юқори даражада ўтказишимиз керак. Биз тайёрмиз ва финалга чиқишни истаймиз», — деди Флик матбуот анжуманида.

Эслатиб ўтамиз, ўтган мавсумда ҳам «Барселона» ва «Атлетико» айнан ярим финалда тўқнаш келишган эди. Ўшанда «кўк-анорранглилар» майдонида 4:4 ҳисобидаги дуранг қайд этилган, Мадридда эса каталонияликлар 1:0 ҳисобида ғалаба қозонишган эди.