Машҳур инглиз собиқ футболчиси Дэвид Бекхэм «Ан-Наср» ҳужумчиси Криштиану Роналду ҳақидаги фикрлари билан ўртоқлашди.

Сўнгги пайтларда матбуотда «Интер Майами» раҳбарларидан бирининг Саудия Арабистонини тарк этиш ҳақида ўйлаётган португалиялик юлдузни ўз клубига жалб қилиш нияти борлиги ҳақида миш-мишлар тарқалмоқда. Ҳозирча бу маълумотлар ўз тасдиғини топмаган бўлса-да, бу инглиз афсонасининг 41 ёшли форвардга бўлган эҳтиромига тўсқинлик қилмаяпти.

«Роналдунинг «Реал»даги даври — бу шунчаки ақл бовар қилмас ҳодиса. У ўзи ўйнаган ҳар бир жамоада — Португалия терма жамоаси, «Манчестер Юнайтед», «Реал», «Ювентус» ва «Ан-Наср»да катта мерос қолдирди. Ажойиб карьера», — деди Бекхэм Рио Фердинанднинг подкастида.

Эслатиб ўтамиз, Криштиану Роналдунинг «Ан-Наср» билан амалдаги шартномаси 2027 йилгача мўлжалланган.