Халқаро футбол федерацияси (ФИФА) Бильбаонинг «Атлетик» клубини янги футболчиларни рўйхатдан ўтказишга тақиқ қўйилган клублар рўйхатига киритди, деб хабар беради ташкилот расмий сайти.
Санкция кетма-кет учта трансфер ойнаси — 2026 йил ёзи, 2027 йил қиши ва 2027 йил ёзи давомида амал қилади. Басклар янги футболчиларни рўйхатдан ўтказишни 2028 йилнинг январидан бошлашлари мумкин бўлади.
ФИФА ҳозирча жазо сабабларини расман тушунтирмади ва бундай чоралар «молиявий низолар ёки регламент бузилиши» учун қўлланилишини қайд этиш билан чекланди. Испания ОАВларининг хабар беришича, «Атлетик»нинг ўзида бу вазият фожиа сифатида кўрилмаяпти: гап футболчига бўлган ҳуқуқлар бўйича келишмовчилик ҳақида кетмоқда ва клуб яқин соатлар ичида бу масалани ҳал қилиш ниятида.
«Атлетик» Ла Лигада 23 та ўйиндан сўнг 28 очко билан ўнинчи ўринда бормоқда ва пешқадам «Барселона»дан 30 очкога ортда қолмоқда. 15 февраль куни жамоани «Овьедо»га қарши сафар ўйини кутмоқда. Шунингдек, олдинда Испания Кубоги ярим финали ҳам бор, унда басклар дастлабки учрашувдан сўнг «Реал Сосьедад»га имкониятни бой беришмоқда (0:1).
