«Бавария» Дайо Упамеканонинг жамоада қолишини расман эълон қилди. Франциялик ҳимоячи Мюнхен гранди билан шартномасини 2028/2029 йилги мавсум якунига қадар узайтирди.
Сўнгги ойларда Упамекано доимий равишда турли миш-мишлар марказида бўлиб келаётган эди, чунки унинг амалдаги шартномаси шу ёзда ўз ниҳоясига етарди. 27 ёшли футболчи «Бавария»даги бешинчи мавсумини ўтказмоқда. Ушбу давр мобайнида Дайо 180 та расмий ўйинда майдонга тушиб, ўз ҳисобига 6 та гол ва 11 та ассист ёздириб қўйган.
«Бавария» Германия чемпионатида пешқадамлик қилмоқда ва иккинчи ўриндаги Дортмунднинг «Боруссия» жамоасини 6 очкога ортда қолдирмоқда. Шанба куни, 14 февраль куни Мюнхен клуби сафарда «Вердер»га қарши майдонга тушади.
