«Манчестер Сити» бош мураббийи Хосеп Гвардиола ярим ҳимоячи Бернарду Силванинг келажаги ҳақида маълумотга эга эмаслигини айтди.
«Йўқ. Менда ҳеч қандай тасаввур йўқ. Рости. Мен унга: «Қачон бир қарорга келсанг, менга хабар бер», дедим. Лекин ҳозирча ҳеч нарса билмайман», — деди Гвардиола жума кунги матбуот анжуманида.
Амалдаги шартномага кўра, Бернарду Силванинг «Манчестер Сити» билан келишуви жорий мавсум якунигача, яъни 2026 йилнинг ёзига қадар мўлжалланган. Португалиялик футболчи 2017 йилнинг ёзида «Монако»дан трансфер қилинганидан бери «шаҳарликлар» сафида тўп суриб келмоқда. Бернарду «Сити» либосида 442 та ўйинда майдонга тушиб, 74 та гол ва 78 та голли узатмани ўз ҳисобига ёздириб қўйган.
