"Бавария" бош мураббийи Венсан Компани Бундеслиганинг "Вердер"га қарши бўладиган бўлажак ўйини ҳақида ўз фикрлари билан ўртоқлашди.
Компанининг таъкидлашича, рақибнинг турнир жадвалидаги ўрнидан қатъи назар, Германия чемпионатида умуман осон ўйинлар бўлмайди. Шунингдек, мутахассис "Вердер"да ҳозир янги мураббий ишлаётганини ва у жамоа ўйинини қайта қураётганини қайд этди.
"Футбол нуқтаи назаридан улар ёмон ўйнашмаяпти, шунчаки голлар етишмади. Агар умумий манзарага қарасангиз, улар ўйлаганингизчалик ёмон ҳаракат қилишмади. Бу яхши жамоа. Рақибда янги мураббий бўлганида, тактик жиҳатдан мослашувчан бўлиш ва ўз кучли томонларингга янада кўпроқ эътибор қаратиш керак", — дея Компанининг сўзларини келтирмоқда "Bayern & Germany".
Германия чемпионатининг 22-тури доирасидаги "Вердер" (16-ўрин) ва "Бавария" (1-ўрин) ўртасидаги учрашув бугун, 14 февраль куни бўлиб ўтади. Ўйин Тошкент вақти билан 19:30 да бошланади.
