«Ливерпуль» ҳимоячиси Виржил ван Дейк жамоадоши Муҳаммад Салоҳнинг келажаги ҳақида фикр билдирди.
Нидерландиялик футболчи Салоҳ «қизиллар» шарафини ҳимоя қилишда давом этишини хоҳлашини яшириб ўтирмади ва мисрлик ҳужумчига мақтовлар ёғдирди.
«У ҳар доим жамоага голлардан ҳам кўпроқ нарса беради. Очиғи, ҳозир ҳамманинг эътибори унинг голларига қаратилган, чунки у жуда юқори стандартларни ўрнатиб қўйган ва камроқ гол урса, дарров танқидларга учрайди. Ҳар қандай ҳолатда ҳам Муҳаммад жамоада қолишини истайман, чунки у менинг яқин дўстим ва биз кўп йиллар давомида биргаликда паст-баландликларни бошдан кечирдик», — деди ван Дейк.
Муҳаммад Салоҳнинг амалдаги шартномаси яна 1,5 йил давом этади. Эслатиб ўтамиз, декабрь ойида футболчи «Ливерпуль» раҳбариятининг унга бўлган муносабатидан норози бўлиб, клубни оммавий равишда танқид қилган эди. Шунингдек, вингер бош мураббий Арне Слот манзилига ҳам танқидий фикрлар билдирганди.
