Испания чемпионати 24-туридан ўрин олган сафардаги баҳсда «Барселона» «Жирона»га 1:2 ҳисобида имкониятни бой берди.
Opta маълумотларига кўра, «кўк-анорранглилар» 2004/05 йилги мавсумдан буён Ла Лигада рақиб дарвозасига камида 27 та зарба (пенальтини ҳисобга олган ҳолда) йўллаб, мағлуб бўлган вазият фақат иккинчи бор кузатилди.
Бундан олдинги шундай ҳолат 2015 йилнинг октябрь ойида «Севилья»га қарши сафар ўйинида қайд этилган эди. Ўшанда «Барселона» 28 та зарба берган, аммо мезбонлар 2:1 ҳисобида ғалаба қозонишган.
«Жирона»дан учралган мағлубият «Барселона» учун кетма-кет иккинчиси бўлди. Жамоа ҳозирда Испания чемпионати турнир жадвалида 24 ўйиндан сўнг 58 очко билан иккинчи ўринни эгаллаб турибди.
