«ПСЖ»нинг грузиялик вингери Хвича Кварацхелия «Монако»га қарши кечган Чемпионлар лигаси ўйинида ёқимсиз статистика билан ёдда қолди.
Плей-офф босқичининг илк учрашуви парижликларнинг 3:2 ҳисобидаги иродали ғалабаси билан якунланди. Кварацхелия майдонда 69 дақиқа ҳаракат қилди ва самарали ҳаракатлар билан ажралиб тура олмади.
«Opta Sports» маълумотларига кўра, 25 ёшли футболчи бутун ўйин давомида «Монако» дарвозасига саккиз бор зарба берган, бироқ уларнинг бирортаси аниқ чиқмаган (дарвоза соҳасига бормаган). Таъкидланишича, бу Чемпионлар лигасининг антирекорди (статистика 2003 йилдан бери юритилади) такрорланишидир. Бу антирекорд «Арсенал»нинг собиқ ҳужумчиси Тьерри Анрига тегишли бўлиб, француз билан бундай ҳолат икки марта — 2004 йилда «Челси»га ва 2006 йилда ЦСКАга қарши ўйинларда содир бўлган.
Ушбу мавсумда Хвича барча мусобақаларда 30 та учрашувда майдонга тушиб, саккизта гол урди ва олтита ассистни ўз ҳисобига ёздириб қўйди.
