«ПСЖ» футболчиси Дезире Дуэ Чемпионлар лигаси доирасида «Монако»га қарши кечган баҳсдан (3:2) сўнг журналистлар билан суҳбатлашди.

20 ёшли вингер учрашув қаҳрамонига айланди: у 27-дақиқада, ҳисоб монегасклар фойдасига 2:0 бўлиб турган вазиятда жароҳат олган Усмон Дембеле ўрнига майдонга тушди ва иккита гол ҳамда битта ассист қайд этишга улгурди. Айнан ёш француз 67-дақиқада меҳмонларнинг ғалаба голи муаллифига айланди.

«Биз хурсандмиз. Энг муҳими — ғалаба қозонишни уддаладик. Мен ҳеч кимга ҳеч нарсани исботлашим шарт эмас, шунчаки ўз футболимни ўйнашга ҳаракат қиляпман. Бугун бу ўз натижасини берди — гол урдим ва жамоамга ёрдам бердим, ўз ишимни бажардим. Мураббий асосий таркибни танлайди ва энг кучлиларни майдонга туширишга интилади. Мен асосий таркибда тушмаган бўлсам-да, ўз ҳиссамни қўшдим ва бундан жуда мамнунман», — деди Дуэ «Canal+»га берган интервьюсида.

Жавоб ўйини келгуси чоршанба куни бўлиб ўтади.