Чемпионлар Лигасининг 2025/2026 йилги мавсуми плей-офф босқичининг дастлабки ўтиш ўйини якунланди. Унда Норвегиянинг «Будё-Глимт» ва Италиянинг «Интер» жамоалари ўзаро баҳс олиб боришди. Мазкур ўйинда Норвегия жамоаси 3:1 ҳисобида ғалаба қозонди. Учрашув Будёдаги «Аспмюра» стадионида бўлиб ўтди. Баҳсни бош ҳакам Даниэль Зиберт (Берлин, Германия) бошқариб борди.
21-дақиқада Сондре Брунстад ҳисобни очди ва Норвегия жамоасини олдинга олиб чиқди. 30-дақиқада Франческо Эспозито жавоб тўпини киритди. 61-дақиқада Йенс Петтер Хёуге яна мезбонларнинг устунлигини таъминлади. 64-дақиқада эса Каспер Хёг норвегияликларнинг учинчи голини урди.
«Интер» ва «Будё-Глимт» ўртасидаги жавоб учрашуви 24 февраль куни бўлиб ўтади. Ўйин Миландаги «Сан-Сиро» («Джузеппе Меацца») стадионида ўтказилади.
Чемпионлар Лигасининг умумий босқичи якунларига кўра, Норвегия жамоаси тўққиз очко тўплаб, 23-ўринни эгаллаган эди. Италия клуби эса 15 очко билан 10-поғонадан жой олган.
