«Тоттенхэм»нинг янги тайинланган бош мураббийи Игор Тудор «Арсенал»га қарши бўлажак дерби олдидан жамоадаги кадрлар муаммоси ҳақида гапирди.
Мутахассиснинг таъкидлашича, айни дамда «шпорлар» ихтиёрида бўлажак учрашув учун тайёр футболчилар сони жуда кам ва бу жиддий қийинчиликлар туғдирмоқда.
«Машғулотимизда бор-йўғи 13 нафар футболчи иштирок этди. Вазият шундай, буни қабул қилиш керак. Аммо якшанба куни керакли натижага эришиш учун 13 нафар футболчи ҳам етарли. Энг муҳим вазифамиз — ижобий натижа қайд этиш», — дея Тудорнинг сўзларини келтиради ESPN.
Лондон клуби Англия Премьер-лигаси турнир жадвалида 29 очко билан 16-ўринни эгаллаб турибди.
«Тоттенхэм» ва «Арсенал» ўртасидаги баҳс якшанба куни бўлиб ўтади ва Тошкент вақти билан соат 21:30 да бошланади.
