Каталониянинг «Барселона» клуби Испания чемпионати турнир жадвалида пешқадамликни ўз қўлига қайтариб олди. Бироқ «Леванте»га қарши баҳснинг илк дақиқаларида дарвозабоннинг муваффақиятли ўйини бўлмаганида, ҳаммаси бошқача тус олиши мумкин эди. Ўйиндан сўнг германиялик мутахассис дарвозабон Жоан Гарсияга миннатдорчилик билдирди.
«Бизда шундай дарвозабон борлигидан жуда мамнунмиз. У — ажойиб реакцияга эга, ҳар томонлама мукаммал голкипер», — дея Фликнинг сўзларидан иқтибос келтиради клуб расмий сайти.
Эслатиб ўтамиз, айнан «Барселона» Испаниянинг амалдаги чемпиони ҳисобланади. Испания чемпионатининг навбатдаги турида клуб ўз майдонида «Вильярреал»ни қабул қилади. Учрашув февраль ойининг сўнгги куни — 28 февраль санасида бўлиб ўтади.
