«Барселона» ярим ҳимоячиси Марк Берналь жамоанинг собиқ юлдузи Серхио Бускетс билан ўзини солиштиришларига нисбатан фикр билдирди.

Якшанба куни 18 ёшли футболчи учрашувнинг 4-дақиқасидаёқ ҳисобни очиб, каталонияликларга «Леванте» устидан ғалаба қозонишда (3:0) ёрдам берди. 66-дақиқада «кўк-анорранглилар» бош мураббийи Ҳанс-Дитер Флик ярим ҳимоячини жароҳатидан қутулган Педрига алмаштирди.

«Бускетс билан солиштирилишим мен учун улкан шараф, лекин мен фаолиятимни эндигина бошлаяпман. «Камп Ноу»да киритилган ҳар бир гол ўзига хос ҳиссиётларни тақдим этади. Бу ажойиб лаҳза эди. «Барселона» — дунёнинг энг яхши клуби. Асосий таркибдан жой олиш учун ҳар биримиз бор кучимизни беришимиз керак. Бугун биз ажойиб ўйин кўрсатдик, ғалаба қозондик ва дарвозамиз дахлсизлигини сақлаб қолдик, бундан жуда мамнунмиз», — дея Берналнинг сўзларини келтирмоқда Barca Universal.

Ёш испаниялик футболчи «Барселона» сафида ўтказган 23 та ўйинида иккита гол ва битта голли узатмани амалга оширди.