«Barselona» yarim himoyachisi Mark Bernal jamoaning sobiq yulduzi Serxio Buskets bilan o‘zini solishtirishlariga nisbatan fikr bildirdi.

Yakshanba kuni 18 yoshli futbolchi uchrashuvning 4-daqiqasidayoq hisobni ochib, kataloniyaliklarga «Levante» ustidan g‘alaba qozonishda (3:0) yordam berdi. 66-daqiqada «ko‘k-anorranglilar» bosh murabbiyi Hans-Diter Flik yarim himoyachini jarohatidan qutulgan Pedriga almashtirdi.

«Buskets bilan solishtirilishim men uchun ulkan sharaf, lekin men faoliyatimni endigina boshlayapman. «Kamp Nou»da kiritilgan har bir gol o‘ziga xos hissiyotlarni taqdim etadi. Bu ajoyib lahza edi. «Barselona» — dunyoning eng yaxshi klubi. Asosiy tarkibdan joy olish uchun har birimiz bor kuchimizni berishimiz kerak. Bugun biz ajoyib o‘yin ko‘rsatdik, g‘alaba qozondik va darvozamiz daxlsizligini saqlab qoldik, bundan juda mamnunmiz», — deya Bernalning so‘zlarini keltirmoqda Barca Universal.

Yosh ispaniyalik futbolchi «Barselona» safida o‘tkazgan 23 ta o‘yinida ikkita gol va bitta golli uzatmani amalga oshirdi.