Мадриднинг «Атлетико» клуби бош мураббийи Диего Симеоне Бельгиянинг «Брюгге» жамоасига қарши ўйин олдидан матбуот анжуманида иштирок этди. УЕФА Чемпионлар лигасининг жавоб ўтиш учрашуви 24 февраль куни Тошкент вақти билан соат 22:45 да бошланади.
«Биз жанг қилишимиз, ҳар бир тўп учун курашишимиз ва, албатта, голлар уришимиз керак. Бизга мухлисларимиз 200 фоиз бор кучини берадиган ва футболчилар ҳам майдонда худди шундай жавоб қайтарадиган оқшомлар керак. Нима бўлишини олдиндан ҳеч қачон билмайсиз. Ўйин давомида вазиятга мослаша олиш зарур», — дея Симеоненинг сўзларини келтиради УЕФА расмий сайти.
Мураббий, шунингдек, рақиб жамоа ҳақида ҳам ижобий фикр билдириб, Иван Леко бошчилигидаги «Брюгге» футболчиларининг қатъияти ва жасоратини алоҳида қайд этди.
Эслатиб ўтамиз, жамоалар ўртасидаги дастлабки учрашув 3:3 ҳисобидаги дуранг билан якунланган эди. Мусобақанинг умумий босқичида ушбу клублар 14 ва 19-ўринларни эгаллаган.
