Сешанба, 24 февраль куни УЕФА Чемпионлар лигасининг 1/8 финалида иштирок этадиган тўртта жамоа номи маълум бўлди. Европанинг энг нуфузли клублар турнири плей-офф босқичи доирасидаги икки ўйин натижасига кўра «Атлетико», «Байер», «Ньюкасл» ва «Будё-Глимт» жамоалари ғалаба қозонишди.

Шу тариқа, ушбу тўрт жамоа 1/8 финал босқичида бош соврин учун курашни давом эттиради ва умумий босқичнинг энг кучли саккизта жамоасига қўшилади. Эслатиб ўтамиз, «Арсенал», «Бавария», «Ливерпуль», «Тоттенхэм», «Барселона», «Челси», «Спортинг» ва «Манчестер Сити» клублари ушбу босқичга тўғридан-тўғри йўл олган эдилар.

16 та жамоа иштирок этадиган босқичнинг қолган тўртта йўлланмаси чоршанба, 25 февраль куни ўз эгаларини топади. Улар учун «Аталанта» — «Боруссия Дортмунд», «Ювентус» — «Галатасарой», «ПСЖ» — «Монако» ҳамда Мадриднинг «Реал» ва «Бенфика» жамоалари ўзаро баҳс олиб боришади.