«Ювентус» ўз таркибида ҳужумчи Душан Влаховични сақлаб қолмоқчи.
«Tuttosport» нашрининг маълумотларига кўра, Турин клуби ҳужумчи билан шартномани узайтиришни устувор вазифа деб ҳисоблайди. Сербиялик футболчи мавсум учун ҳозирги 12 миллион евро миқдоридаги маоши (плюс бонуслар) сақланиб қолишини сўрамоқда. «Ювентус» эса ўйинчига йилига 6 миллион евродан ортиқ тўлашни истамаяпти.
Влаховичнинг ўзи ҳам «Ювентус»да қолишни афзал кўрмоқда. Ҳозирча у бошқа жамоалар билан музокаралар олиб бормаяпти. Ҳар икки томон келишувга эришишга интилмоқда.
Душан Влахович 2022 йилда «Фиорентина»дан «Ювентус» сафига 85 миллион евро эвазига ўтган эди. Унинг амалдаги шартномаси 2026 йилнинг 30 июнига қадар мўлжалланган. Жорий мавсумда ҳужумчи 17 та ўйинда майдонга тушиб, олтита гол урди ва иккита голли узатмани амалга оширди.
