«Интер Майами»нинг «Индепендьенте дель Валле»га қарши ўтказилган ўртоқлик учрашуви якунида ғалати воқеа юз берди. Пуэрто-Рикода бўлиб ўтган баҳс Америка жамоасининг 2:1 ҳисобидаги ғалабаси билан якунланди.
Финал ҳуштаги чалинишига оз қолганда, майдонга Лионель Месси билан суратга тушмоқчи бўлган ишқибозлар ёпирилиб кирди. Аввалига ҳаммаси тинч эди, аммо кейин вазият назоратдан чиқиб кетди: югуриб чиққан яна икки нафар фанат суперюлдузга қўл теккизишни шунчалик хоҳлашдики, натижада футболчини бехосдан йиқитиб юборишди. «Қоидабузарлар» зудлик билан қўриқчилар томонидан ушланди, бироқ Лео бундан ғазабланмади — у ўрнидан турди ва хотиржам йўлида давом этди.
Душанба куни «Интер Майами» МЛС доирасидаги навбатдаги учрашувини ўтказади — рақиб «Орландо Сити» жамоаси бўлади.
