"Бавария" бош мураббийи Венсан Компани Дортмунднинг "Боруссия" клубига қарши муҳим ўйин олдидан жамоадаги кадрлар ҳолати ҳақида фикр билдирди. Аввалроқ мюнхенликлар Нойер, Олисе, Павлович, Ито ва Ким Мин Жэ каби футболчиларини йўқотган эди.
"Матбуот анжуманидан сўнг тиббий штаб билан йиғилиш ўтказамиз. У ерда ўйинчилар ҳақидаги сўнгги маълумотларни оламан. Ҳозирча ҳаммаси яхши кўринмоқда. Эҳтимол, ҳамма ҳам Дортмунднинг "Боруссия"сига қарши асосий таркибда майдонга туша олмас. Аммо бизда жуда кучли таркибни тушириш имконияти бор", — деди Компани журналистларга.
"Боруссия" ва "Бавария" ўртасидаги учрашув шанба куни, 28 февраль куни бўлиб ўтади. Германия чемпионатининг 24-туридан ўрин олган ушбу баҳс Тошкент вақти билан 22:30 да бошланиши режалаштирилган.
