Мадриднинг "Атлетико" клуби спорт директори Матеу Алемани ҳужумчи Антуан Гризманн атрофидаги миш-мишларга чек қўйди.
Аввалроқ матбуотда 34 ёшли франциялик футболчи МЛСнинг "Орландо Сити" клубига ўтишга яқин эканлиги ҳақида хабарлар тарқалган эди.
"Бу масала шунчаки спекуляция (тўқима гаплар). Антуаннинг олдида ҳали яна иккита мавсум бор, у бор эътиборини бўлажак вазифаларга қаратган ва унинг ўйини жуда яхши ҳолатда", — дея Алеманининг сўзларидан иқтибос келтирмоқда Goal нашри.
Жорий мавсумда Гризманн "матрасчилар" сафида барча мусобақаларда 36 та ўйинда иштирок этиб, 12 та гол ва иккита голли узатмани амалга оширди. Ҳужумчининг "Атлетико" билан шартномаси 2027 йилнинг июнигача амал қилади.
