"Барселона" ярим ҳимоячиси Педри жароҳатидан сўнг илк бор асосий таркибда майдонга тушишга тайёрланмоқда.
"Кўк-анорранглилар" бош мураббийи Ханс-Дитер Флик 23 ёшли футболчини шанба куни Ла Лига доирасида "Вильярреал"га қарши кечадиган баҳсда дастлабки дақиқалардан майдонга туширишни режалаштирмоқда, деб хабар беради "Diario Sport". Испаниялик юлдуз учун бу бир ойдан кўпроқ вақт ичида — 21 январдан бери илк бор асосий таркибда кўриниш бериши бўлади.
Эслатиб ўтамиз, Педри мушакларидаги муаммолар сабабли "Барселона"нинг еттита учрашувини ўтказиб юборди. Юлдуз хавбекнинг майдонга қайтиши яқиндагина "Леванте"га қарши кечган баҳсда юз берди — ўшанда у 66-дақиқада захирадан ўйинга қўшилган эди.
"Барселона" — "Вильярреал" учрашуви Тошкент вақти билан 20:15 да бошланади.
