«Вильярреал» марказий ҳужумчиси Жорж Микаутадзе Испания чемпионатининг февраль ойидаги энг яхши футболчиси деб топилди.

Ла Лига расмий сайтида хабар берилишича, Грузия терма жамоаси форварди мухлислар ўртасидаги овоз бериш жараёнида тўрт нафар рақибини ортда қолдирди. Улар орасида Федерико Вальверде («Реал»), Абде Эззальзули («Бетис»), Тома Лемар («Атлетико») ва Луис Милья («Хетафе») бор эди.

Якунига етаётган ойда 24 ёшли Микаутадзе иккита учрашувда иштирок этиб, ўз ҳисобига 2 та гол ва 1 та голли узатмани ёздириб қўйди. Умуман олганда, ҳужумчи жорий мавсумдаги 32 та ўйинда «гол+пас» тизими бўйича 15 очко жамғаришга муваффақ бўлди.

Айни дамда «Вильярреал» Ла Лига турнир жадвалида фахрли учинчи ўринни эгаллаб турибди.