"Бавария" ярим ҳимоячиси Йозуа Киммих Дортмунднинг "Боруссия" жамоасига қарши ўтказилган Бундеслига ўйини (3:2) якунларини сарҳисоб қилди.
Мюнхенликлар танаффусгача минимал ҳисобда имкониятни бой бераётган эдилар, бироқ 70-дақиқага келиб Ҳарри Кейннинг дубли эвазига ҳисобда олдинга чиқиб олишди. 83-дақиқада "арилар" мувозанатни тиклашди, аммо кўп ўтмай меҳмонлар яна гол уришди ва устунликни қўлдан чиқаришмади. Ғалаба голига Киммих муаллифлик қилди.
"Бугун жисмоний курашлар ва хатолар кўп бўлди — айниқса биринчи бўлимда. Ритм доимо бузилиб турди. Иккинчи бўлимда эса ўйин анча динамик тус олди. Танаффусда "Боруссия" учун Чемпионлар лигасидаги ўйинлар билан боғлиқ тиғиз тақвим сабабли бундай темпни давом эттириш қийин бўлишини тушуниб тургандик. Ўйин охирига келиб бизда устунлик бўлишини билардик. Хайриятки, бу устунликдан фойдалана олдик", — дея Киммихнинг сўзларини келтиради Bayern & Germany.
"Бавария" турнир жадвалида "Боруссия" билан орадаги фарқни 11 очкогача етказди.
