Севилья дербиси дуранг билан якунланди — Испания чемпионатининг 26-тури доирасида «Бетис» ва «Севилья» жамоалари бир-бирларининг дарвозаларига иккитадан тўп киритишди. «Севилья» таркибида биринчи голни Алексис Санчес урди ва шу тариқа чилилик фахрий Севилья дербисининг янги рекордини ўрнатди.

Гап шундаки, у 37 ёшу 72 кунлигида ушбу принципиал тўқнашувда гол урган тарихдаги энг ёши катта футболчига айланди. Бунгача мазкур натижа афсонавий Хоакин Санчесга тегишли эди — у 2018 йилда 37 ёшу 43 кунлигида гол муаллифи бўлганди.

Испания чемпионатининг кейинги турида «Севилья» жамоаси «Райо Вальекано»га қарши майдонга тушади. Ушбу баҳс келаси якшанба куни бўлиб ўтади.