«Манчестер Юнайтед» бош мураббийи вазифасини вақтинча бажарувчи Майкл Кэррик қўл остидаги дастлабки ўйинларда ҳайратланарли натижаларга эришди.
«Қизил иблислар» унинг бошқарувида ўтказилган еттита ўйиннинг олтитасида ғалаба қозонишди, яна бир бор дуранг натижа қайд этилди. «Кристал Пэлас» устидан қозонилган ғалабадан (2:1) сўнг, жамоа Премьер-лига турнир жадвалида учинчи поғонага кўтарилиб олди.
Инсайдер Фабрицио Романонинг хабар беришича, Кэррикнинг келажаги бўйича якуний қарор ҳали қабул қилинмаган, бироқ клуб раҳбарияти ҳафта сайин мутахассис билан узоқ муддатли шартнома имзолаш мақсадга мувофиқ эканига тобора кўпроқ ишонч ҳосил қилмоқда. Футболчилар ҳам инглиз мутахассисининг ишидан жуда мамнун. Мавсум якунланганидан кейин мураббий билан ҳамкорликни давом эттириш эҳтимоли юқори баҳоланмоқда.
Бундан олдинроқ «Манчестер Юнайтед» келаётган ёзда жамоага «машҳурроқ» ва тажрибалироқ бош мураббий топиш ниятида экани ҳақида хабарлар тарқалган эди.
