Муҳаммад Салоҳ жорий мавсум якунида «Ливерпуль»ни тарк этиши мумкин.
BBC маълумотларига кўра, мисрлик ҳужумчининг шу ёзда клубдан кетиши «тобора ҳақиқатга яқинлашмоқда». 33 ёшли футболчи ўтган йили мерсисайдликлар билан янги икки йиллик шартнома имзолаган эди, бироқ декабрь ойидаёқ «Ливерпуль» билан муддатидан олдин хайрлашиш эҳтимолини инкор этмаслигини билдирганди. Ўшанда Салоҳ мураббийлар штаби билан муносабатлари таранг эканига шаъма қилиб, бир неча бор асосий таркибдан четда қолдирилгани орқали клуб уни амалда «зарба остида қолдирганини» айтган эди.
Қишки трансфер ойнаси ёпилгандан сўнг Салоҳ «Ливерпуль»да қолди ва Африка Миллатлар Кубогидан қайтгач, доимий равишда асосий таркибда майдонга тушмоқда. Шунга қарамай, манбанинг таъкидлашича, мисрлик футболчининг кетиш эҳтимоли ҳамон юқорилигича қолмоқда.
Хабар қилинишича, ҳужумчи фаолиятини Саудия Про-Лигаси клубларидан бирида ёки МЛСда давом эттириши мумкин.
2026 йилда Салоҳ клуб миқёсида тўққизта ўйинда майдонга тушди ва иккита гол уришга муваффақ бўлди.
