Бирмингемнинг «Астон Вилла» клуби «Челси»га тегишли бўлган ва айни дамда ижара асосида «Бавария»да тўп сураётган сенегаллик ҳужумчи Николас Жексонга қизиқиш билдирмоқда. Мюнхен клуби Жексонни жамоада қолдирмасликка қарор қилди ва ижара муддатини узайтирмайди, деб хабар бермоқда инсайдер Экрем Конур ўзининг Х ижтимоий тармоғидаги саҳифасида.

Мавсум якунлангач, Жексон «Челси»га қайтади, бироқ Лондон клуби мураббийлар штаби уни ўз режаларига киритмаган. Шу сабабли у яна ўзига янги жамоа излашига тўғри келади. Бундай вазиятда «Астон Вилла» ҳужумчига шартнома таклиф қилишга ва трансфер масаласини муҳокама қилиш учун лондонликлар билан музокаралар столига ўтиришга тайёр.

Николас Жексон 2023 йилда «Вильярреал»дан 37 миллион евро эвазига «Челси»га ўтган эди, аммо асосий таркибда мустаҳкам ўрин эгаллашни уддалай олмади. Клубдаги фаолияти давомида у 81 та ўйинда майдонга тушиб, 30 та гол урди ва 12 та голли узатмани амалга оширди. «Transfermarkt» маълумотларига кўра, Жексоннинг ҳозирги бозор қиймати 45 миллион еврони ташкил этади.