Бразилия футбол конфедерацияси (CBF) Бразилия терма жамоаси ва "Реал Мадрид" клуби вингери Родриго Гоэснинг ўнг тиззасидаги олдинги хочсимон боғлам ва ташқи мениск узилиши ҳақидаги маълумотга изоҳ берди.
«Бразилия футбол конфедерацияси “Реал Мадрид” ва Бразилия миллий терма жамоаси ҳужумчиси Родриго Гоэсга қўллаб-қувватлов билдиради. У “Хетафе”га қарши Ла Лига доирасидаги учрашувда жиддий жароҳат олди. Родригода ўнг тиззанинг олдинги хочсимон боғлами ва ташқи мениски узилган. CBF футболчига тезроқ соғайиш ва майдонга тез орада қайтишини тилайди», — дейилади конфедерациянинг X ижтимоий тармоғидаги баёнотида.
Аввалроқ Родриго 10 ой давомида тикланиши хабар қилинган эди. Шу тариқа, Бразилия терма жамоаси ҳужумчиси 2026 йилги жаҳон чемпионатини ўтказиб юборади.













