Ла Лига ўз тарихида илк бор Испания футболи тарихига бағишланган «ретро-ўйин куни» (retro-matchday) акцияси ўтказилишини эълон қилди.
Расмий хабарда айтилишича, 10-13 апрель кунлари Ла Лига (31-тур) ва Сегунданинг (35-тур) жами 38 та клуби ўз ўтмишидаги дизайнлардан илҳомланиб яратилган ретро-либосларда майдонга тушади. Ҳакамлар учун ҳам махсус формалар тайёрланади, телетрансляциялар эса ретро-услубдаги графикалар билан узатилади.
Иштирокчиларнинг либослари 19 март куни кенг оммага тақдим этилади.
Mundo Deportivo нашрининг COPE’га таяниб хабар беришича, «Барселона» ва «Реал Мадрид» ушбу акцияда иштирок этмайди.
Каталонияликлар жорий мавсум учун ретро-футболкаларни ўз вақтида ишлаб чиқариш ва сертификатдан ўтказишга тўсқинлик қилган техник муаммолар туфайли рад жавобини беришган, бироқ кейинги мавсумда қатнашишни режалаштирмоқдалар. «Реал Мадрид» эса ўз навбатида лойиҳага қўшилмагани сабабли унда иштирок этмайди. Шунингдек, «Райо Вальекано» ва «Хетафе» клублари ҳам акциядан воз кечишган.
