Аэрофлот Опен ғолиби Ян Непомняший турнирнинг 9-турида дуранг ўйнаган юртдошимиз Муҳаммадзоҳид Суяров ҳақида фикр билдирди.

“Суяров оқ доналарда жуда эҳтиёткор ўйнади. Мен, албатта, ғалаба учун ўйнашни хоҳладим, лекин ютуқ йўлида вазиятни ёмонлаштиргим ҳам келмади.

Бир пайтга келиб, менинг позициям яхшироқ бўлиб қолди, унинг эса вақти кам эди. Аммо мен аниқ ўйнамадим. У бир нечта кучли юришларни топди ва позицияни тенглаштирди. Бу юришларни топиш осон эмас эди, тан олиш керак”.

Россиялик гроссмейстер Суяровнинг олдинги партияларини ҳам эслаб ўтди:

“Агар ростини айтсам, бу партияда у олдинги учта партиядан ҳам яхшироқ ўйнади. Чунки бизнинг матчдан олдин у Дубов, Гришчук ва Рязанцев устидан кетма-кет учта ғалаба қозонган эди.

Ўша партияларда у ҳар сафар деярли ютқазаётган ҳолатда турган, лекин рақиблари хато қилган.

Албатта, шахматда доим хато қилиш эҳтимоли сақланиб туради. Аммо бу сафар улар ёш ўзбек маэстросига қарши ўйинни тўлиқ назорат қила олишмади”.