Лондоннинг «Тоттенхэм» клуби дарвозабони Гульельмо Викарио Италияга қайтиши мумкин. Бу ҳақда журналист Экрем Конур хабар бермоқда.

Манбанинг маълумотларига кўра, «Рома», «Интер» ва «Ювентус» клублари 29 ёшли голкипернинг ҳаракатларини диққат билан кузатиб боришмоқда. Таъкидланишича, туринликлар илк алоқаларни бошлаб юборишган ва трансфер учун 20-25 миллион евро тўлашга тайёр эканликларини билдиришган. Бироқ ҳозирги вақтда ушбу пойгада «Интер» пешқадамлик қилмоқда. «Рома»га келсак, клуб вазият ривожини кузатишда давом этмоқда.

Жорий мавсумда Викарио барча мусобақаларда 39 та ўйинда майдонга тушиб, ўз дарвозасидан 57 та тўп олиб чиқди ва 13 та учрашувда дарвозаси дахлсизлигини сақлаб қолди.

Италиялик посбоннинг «Тоттенхэм» билан амалдаги шартномаси 2028 йилгача мўлжалланган. Transfermarkt портали маълумотларига кўра, футболчининг бозор қиймати 35 миллион еврони ташкил этади.