Суперлиганинг 4-тури доирасидаги «Насаф» — «Сурхон» учрашуви Самарқанд шаҳридаги «Динамо» стадионида бўлиб ўтади.

Маълумки, «Насаф» жамоаси уй учрашувларини Ғузордаги Марказий стадионда ўтказиб келаётган эди. Бироқ, ҳозирда Ғузор шаҳридаги Марказий стадион Суперлига учрашувларини қабул қилиш учун талаб даражасига жавоб бермайди. Шу боис «Насаф» клуби Суперлиганинг 4-туридан ўрин олган учрашувини «Динамо» стадионида ўтказиш бўйича шартнома имзолаб, Лигани хабардор қилди. Учрашув тақвимга мувофиқ 20 март куни бўлиб ўтади.

Шунингдек, Жиззахнинг «Сўғдиёна» клуби «Пахтакор»га қарши 4-тур учрашувини Тошкентдаги «Пахтакор» стадионида ўтказиш бўйича Лигага расмий мурожаат йўллади. Маълумот учун, «Сўғдиёна» жамоаси уй ўйинларини Зоминдаги стадионда ўтказишни режалаштирган эди. Бироқ, айни пайтда стадионда Суперлига талабларига мос ҳолатга келтириш мақсадида қурилиш ва таъмирлаш ишлари олиб борилмоқда.

Шу сабабли «Сўғдиёна» — «Пахтакор» учрашуви, аввал белгиланганидек, 20 март куни ўтказилади. Бунда «Сўғдиёна» жамоаси расман мезбон мақомида майдонга тушади.

Шунингдек, жамоаларнинг иккинчи даврадаги ўзаро учрашуви ҳам тақвимга кўра «Пахтакор» стадионида ўтказилади ва унда «Пахтакор» мезбон сифатида иштирок этади.