Бельгиялик собиқ футболчи Эден Азар Винисиус Жуниорнинг эҳтимол узоқ вақт футбол ўйнамаслиги ҳақида тахмин қилди.

«Вини футболни яхши кўради, у ҳам худди менинг вақтимдагидек, шунчаки майдонга тушиб, ўйиндан завқ олишни истайди. У ҳақида гапирганда, ўйинидан кўра кўпроқ атрофидаги можароларни эслаймиз. Одамлар унинг нақадар ноёб футболчи эканини унутиб қўйишга мойиллар.

Баъзида унга ачинаман. У ўйин вақтида нималарга дуч келишини, у ҳақида нималар дейишаётганини билади. Доимий равишда жазолаш ҳақида гапирилади, лекин амалий чораларга келганда ҳеч нарса ўзгармайди. Менимча, бу у учун жиддий стресс. Агар у 30 ёшида фаолиятини якунласа, бундан ҳайрон қолмайман», — дея Madrid Xtra Азарнинг сўзларидан иқтибос келтиради.

Келаётган ёзда Винисиус 26 ёшини қарши олади. Унинг «Реал» билан шартномаси 2027 йилга қадар мўлжалланган.

Эден Азарнинг ўзи эса 32 ёшида футболчилик фаолиятига нуқта қўйган эди.