"Бавария" ҳимоячиси Алфонсо Дэвис 25 ёшида бутсаларини михга илиши мумкин.
TopSkills Sports UK нашрининг хабар беришича, канадалик футболчи кеча Чемпионлар Лигаси 1/8 финали доирасидаги "Аталанта"га қарши ўйинда (6:1) олган навбатдаги жароҳатидан сўнг фаолиятини якунлаш имкониятини жиддий кўриб чиқмоқда. Ҳимоячининг сон соҳаси орқа мушаклари йиртилгани аниқланган.
"Бавария" Дэвисни бундай қарордан қайтаришга қаттиқ ҳаракат қилмоқда. Агар футболчи барибир фаолиятини якунлашга қарор қилса, Мюнхен клуби унга "Бавария"га бўлган садоқати учун миннатдорчилик сифатида жамоа тузилмасида махсус лавозимни таклиф қилишга тайёр.
Жорий мавсумда Алфонсо Дэвис "Бавария" сафида барча турнирларда 13 та ўйинда майдонга тушиб, 2 та голли узатмани амалга оширди. Унинг шартномаси 2030 йилнинг 30 июнига қадар мўлжалланган.
