Мадриднинг “Реал” клуби дарвозабони Тибо Куртуа “Манчестер Сити”га қарши учрашувдаги ғалабадан сўнг (3:0) футболчилар собиқ мураббий Хаби Алонсо билан можарога бормаганини таъкидлади.

“Футболчилардан ҳеч бири Хаби Алонсони қийин аҳволга солмаган. Ўйлайманки, биз яхши ишладик. Баъзилар бизни тактикани ва видео таҳлилларни ёқтирмаслигимизни айтишди. Эшитиб қўйинг, менинг мураббийим Антонио Конте бўлган ва у ҳар куни бир соат тактика устида ишларди. Мен бунга эътироз билдирмаганман, чунки биз профессионалмиз ва мен учун иш доимо биринчи ўринда туради. Хаби билан илк ойлар жуда яхши ўтди, кейин эса пасайиш бошланди. Футболда бундай ҳолатлар бўлиб туради”, дейди Куртуа.

Бельгиялик дарвозабон, шунингдек, “Қироллик клуби”даги ички муҳит ҳақида тарқалаётган хабарларга муносабат билдирди:

“Матбуотда айрим хабарларни ўқиб ҳайрон қолдим. Бу клубни гўёки болалар боғчаси, футболчилар эса хоҳлаганини қилади, деб ўйлайдилар. Аммо ундай эмас. Биз барча мураббийларни, тиббий ходимларни ва умуман ҳаммани ҳурмат қиламиз. Менимча, танқидларнинг аксарияти адолатсиз. Баъзи маълумотлар тўғри бўлиши мумкин, бунга эътирозим йўқ. Шунинг учун ҳам айтяпман — бу вазиятда биз ҳам айбдормиз”.

Маълумот учун: Хаби Алонсо 2026 йил январь ойида “Реал” бош мураббийи лавозимини тарк этган эди. Шундан сўнг жамоага яна бир собиқ футболчи Альваро Арбелоа бош мураббий этиб тайинланди.

“Реал Мадрид” УЕФА Чемпионлар Лигаси 1/8 финал босқичининг дастлабки учрашувида “Манчестер Сити”ни 3:0 ҳисобида мағлуб этди. Ушбу жуфтлик иштирокидаги жавоб баҳси 18 март куни Манчестер шаҳридаги “Etihad” стадионида ўтказилади.