«Челси» вингери Педру Нету «Барселона»нинг трансфер қизиқишлари рўйхатига тушди. Журналист Фернандо Полонинг хабар беришича, «кўк-анорранглилар» португалиялик футболчининг ўйинини кузатиб боришмоқда ва агар келаётган ёзда ҳужум қанотларини кучайтириш зарур деб топилса, уни сотиб олиш имкониятини кўриб чиқишлари мумкин.
Каталония клуби скаутлари Нету ҳақида «жуда ижобий» ҳисоботларга эга, 26 ёшли футболчининг агенти Жорже Мендеш эса спорт директори Деку ва «Барса» раҳбарияти билан фаол алоқада бўлиб турибди. Ҳозирча аниқ музокаралар олиб борилаётгани йўқ, бироқ Ла Лига гранди ўйинчини кузатишда давом этмоқда.
Transfermarkt порталида Педру Нетунинг баҳоси 60 млн евро этиб белгиланган, унинг «Челси» билан амалдаги шартномаси 2031 йилгача мўлжалланган.
