Лондоннинг «Арсенал» клуби собиқ футболчиси Пол Мерсон жамоа бўлажак турдаёқ ўзига чемпионликни кафолатлаши мумкин деб ҳисоблайди.

Шанба куни «тўпчилар» ўз майдонларида «Эвертон»ни қабул қилишади, «Манчестер Сити» эса «Вест Хэм» меҳмони бўлади. Айни дамда Микель Артета шогирдлари 30 та ўйиндан сўнг 67 очко жамғарган ҳолда турнир жадвалида пешқадамлик қилмоқда. «Шаҳарликлар» эса битта захира ўйинига эга бўлса-да, пешқадамдан етти очкога ортда қолмоқда.

«Эвертон» — ноқулай рақиб, лекин мен «Арсенал» кескин курашларга бой ўйинда 2:1 ҳисобида ғалаба қозонишини кутяпман. Агар «Манчестер Сити» «Вест Хэм»ни мағлуб эта олмаса ва «Арсенал» ҳақиқатан ҳам зафар қучса, унда чемпионлик пойгаси якунланади! «Сити» учун бу жуда муҳим ҳафта — улар саноқли кунлар ичида ҳам Чемпионлар лигаси, ҳам АПЛдаги муваффақият имкониятларидан маҳрум бўлиш хавфи остида турибди. «Реал»дан учралган мағлубият уларни руҳан тушириб юборди, шу боис мен «Вест Хэм» билан ўйинда 2:2 ҳисобидаги дурангни тахмин қиламан», — дея Мерсоннинг сўзларини келтирмоқда «Arsenal News Channel».

Эслатиб ўтамиз, «Арсенал» охирги учта мавсумни иккинчи ўринда якунлаган эди.