Мадриднинг «Реал» клуби ярим ҳимоячиси Арда Гюлер «Эльче»га қарши учрашувда ноёб гол муаллифига айланди.

Туркиялик футболчи шанба куни «Сантьяго Бернабеу» стадионида бўлиб ўтган 28-тур баҳсининг 89-дақиқасида ўз маҳоратини кўрсатди. 21 ёшли хавбек меҳмонлар дарвозасини майдоннинг ўз жамоасига тегишли қисмидан туриб ишғол қилди. Журналист Фран Мартинеснинг таъкидлашича, Гюлер қарийб 69 метр масофадан гол урган – бу Ла Лига тарихидаги гол билан якунланган энг узоқ масофали зарба бўлиб рекорд ўрнатди. Бунгача бўлган рекорд «Нумансия» футболчиси Антониога тегишли эди; у 2004 йилнинг ноябрь ойида «Севилья» дарвозасини 67 метрдан ишғол қилганди.

«Реал» «Эльче» устидан 4:1 ҳисобида ғалаба қозонди. Арда Гюлернинг голи учрашувдаги якуний натижани белгилаб берди.