Лондоннинг «Арсенал» клуби 16 ёшли футболчиси Макс Доуман «Эвертон»га қарши ўйинда гол уриб, рекордни янгилади. Вингер Премьер-лига бутун тарихидаги энг ёш гол муаллифига айланди — у 16 ёшу 73 кунлигида рақиб дарвозасини ишғол қилишга муваффақ бўлди. «Канонирлар» вундеркинди катталар футболидаги дебют голини шанба куни АПЛнинг 30-тури доирасида кечган баҳснинг 97-дақиқасида киритиб, ўйиннинг якуний натижасини (2:0) белгилаб берди.

Ушбу баҳс Макс Доуман учун «Арсенал» асосий жамоаси сафида барча турнирлар доирасидаги еттинчи ўйин бўлди. Бунгача футболчи битта голли узатмани амалга оширишга улгурган эди.

Микель Артета жамоаси 70 очко жамғарган ҳолда турнир жадвалида пешқадамлик қилмоқда.