«Барселона» спорт директори Деку вингер Маркус Рэшфорднинг келажаги ҳақида гапирди.

Англиялик футболчи «Манчестер Юнайтед»дан жорий мавсум якунига қадар ижарага олинган. Бир неча бор хабар берилганидек, «кўк-анорранглилар» 28 ёшли футболчининг трансферини тўлиқ сотиб олишга қизиқиш билдирмоқда, бироқ талаб қилинаётган 30 миллион еврони тўлаш ниятида эмас.

«Бизда Рэшфорднинг вазияти бўйича аниқ тасаввур бор ва уни олиб қолиш учун нима кераклигини биламиз. Ҳаммаси молиявий фэйр-плей қоидаларига, бизнинг устувор режаларимизга, натижаларга ва мураббийнинг талабларига боғлиқ бўлади. Ҳозирча якуний қарор қабул қилингани йўқ, чунки бунинг учун ҳали вақт келмади», — деди Деку.

Якшанба куни бўлиб ўтган «Барселона»нинг «Севилья»га қарши ўйинида (5:2) Маркус Рэшфорд захира ўриндиғида қолди.