Туркиянинг "Истанбулспор" клуби ўз собиқ ҳимоячиси, 20 ёшли Баран Вардарнинг вафоти ҳақида эълон қилди. Футболчи саратон касаллигига чалинган эди ва ушбу мудҳиш хасталикдан сўнг ҳаётдан кўз юмди.
Гап Туркиянинг кучи жиҳатидан иккинчи дивизионида иштирок этаётган ва турнир жадвалида 14-ўринни эгаллаб турган жамоа ҳақида кетмоқда. Клуб тарбияланувчиси бўлган Баран 2024 йилнинг баҳорида асосий жамоада дебют қилган ва ўшанда ҳатто "Фенербахче"га қарши ўйнашга ҳам улгурган эди. Бироқ кўп ўтмай унда оғир хасталик аниқланди ва у футболчилик фаолиятини тўхтатиб, яшаш учун курашишга мажбур бўлди. Афсуски, бу курашда у мағлуб бўлди.
