"Бавария"да дарвозабонлар билан боғлиқ жиддий муаммо юзага келган. Хайриятки, Йонас Урбиг бош мия чайқалишидан сўнг "Аталанта"га қарши ўйингача тикланишга улгуриши керак. Аммо агар бу содир бўлмаса, мюнхенликлар 16 ёшли Леонард Прескотт хизматидан фойдаланишига тўғри келади.
Германия матбуотининг ёзишича, Прескотт билан боғлиқ вазиятда "Бавария" меҳнат қонунчилиги муаммосига дуч келмоқда. Гап шундаки, мамлакатда 18 ёшга тўлмаган шахсларнинг соат 20:00 дан кейин ишлаши тақиқланган. "Бавария"нинг ўйини эса маҳаллий вақт билан 21:00 да бошланади.
16 ёшли футболчи ўйин қайдномасидан жой олиши учун "Бавария" махсус давлат органидан рухсат олиши лозим. Бундан ташқари, клубга Прескоттнинг ота-онаси, унинг педиатри ва мактабининг розилиги керак бўлади.
Агар бундай рухсат олинса, Леонард Прескотт ўйиндан сўнг камида 12 соат дам олиши шарт. Бу эса у эртаси куни мактабга бормаслигини англатади.
