Мексика президенти Клаудия Шейнбаум Эрон терма жамоаси ҳақида гапирар экан, ушбу Яқин Шарқ жамоасининг Жаҳон чемпионатидаги ўйинларини ўз мамлакатида қабул қилишга тайёрлигини билдирди.
"Бу масала кўриб чиқилмоқда ва вақти келганда сизга хабар берамиз. Мексика дунёнинг барча мамлакатлари билан алоқаларни қўллаб-қувватлайди. Кўрамиз, ФИФА қандай қарор қабул қилар экан. Уларнинг ўйинларини қабул қилишимиз учун ҳеч қандай тўсиқ йўқ", — дея Шейнбаумнинг сўзларини келтиради El Universal.
Эслатиб ўтамиз, Эрон терма жамоаси ўз ўйинларини АҚШда ўтказиши керак эди. Бироқ бир неча кундан бери америкаликлар Исроил билан иттифоқчиликда Форс кўрфазида Эронга қарши ҳарбий ҳаракатлар олиб бормоқда. Аввалроқ АҚШ раҳбари Дональд Трампнинг ўзи, агар Эрон терма жамоаси мундиал учун мамлакатга учиб келса, уларнинг хавфсизлигини таъминлай олмаслигини айтган эди.
