Норвегиянинг "Будё-Глимт" клуби устози Кьетил Кнутсен УЕФА Чемпионлар лигаси 1/8 финалининг жавоб учрашувида Лиссабоннинг "Спортинг" жамоасидан учралган йирик мағлубият ҳақида фикр билдирди. Скандинавияликлар қўшимча вақтда 0:5 ҳисобида имкониятни бой беришди.
"Жамоа ўз футболини ўйнамади. Ўйинчилар хаёлида биринчи ўйин натижасини ушлаб туришган эди. Рақиб эса майдонга тушди ва ғалабадан бошқа ҳеч нарса ҳақида ўйламади. Бу учрашувда бизнинг футболимиздан фақат камёб лаҳзаларгина кўринди, холос", — дея мутахассиснинг сўзларини келтиради УЕФА матбуот хизмати.
Эслатиб ўтамиз, биринчи ўйинда Норвегия жамоаси 3:0 ҳисобида ғалаба қозонган эди.
"Спортинг" Чемпионлар лигасининг чорак финалига йўл олди ва у ерда Лондоннинг "Арсенал" клуби билан тўқнаш келади.
