«Арсенал» ўз таркибида ярим ҳимоячи Деклан Райсни сақлаб қолиш ниятида.

Инсайдер Николо Скиранинг маълумотларига кўра, Лондон клуби футболчи билан 2030 ёки 2031 йилнинг ёзига қадар мўлжалланган янги шартнома имзолашга яқин турибди. Райс «Арсенал» лойиҳасига тўлиқ содиқ ва уни Мадриднинг «Реал» ҳамда «Барселона» клублари томонидан бўлаётган қизиқишлар ҳақидаги миш-мишлар ташвишга солмаяпти.

Деклан Райс 2023 йилда «Вест Хэм»дан «Арсенал»га 116 миллион евро эвазига ўтган эди. Унинг «тўпчилар» билан амалдаги шартномаси 2028 йилнинг 30 июнигача мўлжалланган. Жорий мавсумда ярим ҳимоячи Лондон клуби сафида барча турнирларда 43 та ўйинда майдонга тушиб, бешта гол урди ва 11 та голли узатмани амалга оширди. Transfermarkt портали Райснинг трансфер қийматини 120 миллион еврога баҳоламоқда.