«Бавария» бош ижрочи директори Ян-Кристиан Дрезен Чемпионлар лигаси 1/4 финалида «Реал» билан бўладиган учрашув борасида ўз фикрларини билдирди.
«Бавария» — «Реал» қарама-қаршилиги — бу ҳақиқий эпик тўқнашув. Кўрамиз, бу сафар нима содир бўларкин. Илгари биз уларга имкониятни бой берганмиз, кўпинча бу нохуш вазиятлар остида юз берган. Энди буни ўзгартириш ва ярим финалга чиқиш вақти келди.
Футболчилар ушбу ўйинларни интизорлик билан кутишмоқда. Мен ҳам иккита ҳаяжонли баҳс интиқлик билан кутяпман — дастлабки ўйиннинг Мадридда ўтиши биз учун яхши. Фаворитлар йўқ. Ҳаммаси ўйин сифатига ва балки бир оз омадга боғлиқ бўлади.
Ҳозирча эса терма жамоалар танаффусидан сўнг барча футболчилар сафга соғ-саломат қайтишига умид қиламиз», — деди Ян-Кристиан Дрезен.
Эслатиб ўтамиз, жамоалар сўнгги бор 2024 йилги Чемпионлар лигаси ярим финалида тўқнаш келишган эди. Ўшанда «Реал» жавоб ўйинида 2:1 ҳисобида ғалаба қозониб, финалга йўл олган. Ўша баҳснинг қўшиб берилган дақиқаларида Маттейс де Лигт «Мадрид» дарвозасини ишғол қилишидан олдин ҳакам Шимон Марчиняк ҳуштак чалиб ўйинни тўхтатгани кўплаб баҳс-мунозараларга сабаб бўлган эди.
