Франциянинг «Лион» клуби устози Паулу Фонсека Европа Лигаси 1/8 финали доирасидаги жавоб баҳсини ўз майдонларида ўтказиш қанчалик муҳим эканини таъкидлади. «Лион»га Испаниянинг «Сельта» жамоаси рақиблик қилмоқда, уларнинг дастлабки тўқнашуви 1:1 ҳисобидаги дуранг билан якунланган эди.
«Жавоб ўйинини ўз уйимизда ўтказишимиз биз учун омаддир. Менимча, барча футболчилар ҳозирги вазиятимизни ва нима учун курашаётганимизни яхши англаб туришибди. Пессимист бўлиш учун ҳеч қандай сабаб йўқ», — дея Фонсеканинг сўзларидан иқтибос келтирмоқда УЕФА расмий сайти.
Рақиб маҳорати ҳақида гапирар экан, Фонсека «Сельта»нинг ҳимояси кучли эканини ва уларга қарши баҳсда бўш ҳудудларни топиш мураккаб кечганини қайд этди. «Сельта»нинг қарши ҳужумларда хавфли ҳаракат қилиши «Лион»ни ўйин давомида мувозанатни сақлаш ҳақида ўйлашга мажбур қилмоқда.
Учрашувнинг старт ҳуштаги Тошкент вақти билан соат 00:45 да янграйди.
